Aduunku, bay dhahaan dadka
qaarkood, waa shan casho iyo wixii la mid ah. Balse, runtii, waxa ay san dadkaas
arkin mid la yiraahdo Dalmar.
Haday Dalmar arki lahaayeen, iska dhaaf bal in ay
yaqaanaan e, waxaa laga yaabi lahaa in ay san waxaas iyo wax la mid ah waligood
aamini lahayn.
Marka aad aragtid wajigiisa, oo shan iyo labaatan
astaan oo nabaro iyo xagtimo ay noloshu sidii farshan ugu soo manaysatay,
waxaad ba isdhahaysaa kan waa
mid taariikhdii aduunka oo dhan wajigiisa looga tagay.
“Maya,” buu kuugu jawaabi lahaa se, asagoo laga yaabo
in uu qosol kuugu daro, “Waxaan ahay mid soo noolaadday.”
War ilaahay amarkiisu badanaa.
Dalmar wuxuu dhashay 1968dii, sideed sano ka dib
markii dadkiisu gumeystihii ay ka guulaysteen. Wuxuuna dhashay maalin Arbaco
ah, wiigaas kala barkiisa, oo ahayd maalintii 17aad ee bisha Abril.
Hadii laga yaabo in aad tahay mid ka mid ah
qolooyinka xidigaha raaca, amaba se waxay gaalladu Ingiriiska ku dhahaan astrology, amaba se wixii
Carabtu dhihi jireen cilm ul
tanjiim, amaba se wixii awooweyaasheen dhihi jireen falaga, waxaad ogaan lahayd in
taas macnaheedu tahay in uu yahay Kacoow, amaba se waxay dhahaan Aries luuqaddaas Ingiriiska, amaba se waxay
Carabtu dhihi jireen Burj ul
Xamal.
“Xagee ku dhalatay?” bay habartii waydiisay, ayadoo
indhaheedii aadba moodid in ay wiilkaas ka dhex bixi rabaan, markuu shan sano
jiray.
“Liido,” buu yiri, asagoo baqaya.
Ceeblo, habartaas falaga ka warranta, cayaalka oo
dhan way ka baqi jireen. Wajigeeda ma ahan mid saas uga duwan dumarka ay
yaqaaneen, laakiin indhaheeda—koleey markay saas kuu fiiriso adigaaba ka baqi
lahaa laftigaaga.
Markuu jawaabtii siiyay bay indhaha isku qabatay.
Cabaar bay aamusnayd. Wiilkii yaraa sidii buu u sii fiirshay, asagoo
iswaydiiyay waxay indhaha isugu qabatay.
Markaasay indhihii kala furtay.
“Dhulbaraha baad waqooyiga ka jirtaa,” bay si dhaqso
leh u tiri, ayadoo warkeedii sii wada, “Marka waa in aan kii Reer Galbeedka kuu
sheegaa,” bay ku dartay, “Waxaad tahay Kacoow, astaanka ugu horeeya falaga. Kacoowgu
waa midka Qoraxdu ugu jeceshahay…”
Calaa kuli xaal, habartaas maskiinkii yaraa sidii bay
bool uga riday.
Maalintaas, markuu guriggiisii tagay, hooyadiis wuxuu
ku yiri waxaan ahay Kacoow. War bal Kacoow hooyo Soomaali maxay ka taqaan?
Istustus iyo halagaa sheego baa ka soo hartay kii yaraa. Cayaalkii
xaafadda oo dhan wuxuu u sheegay in uu yahay mid Qoraxdu jeceshahay.
“Iftiinkoo dhan baa kaa qaadaa,” buu ku yiri Raaxoow,
oo ahaa mid labo sano ka waynaa.
Nabarka ugu wayn oo wajigiisa maanta ku yaal, kaas oo
ah jeex sunniggiisa bidixda korkiisa ku yaal, buu maalintaas Raaxoow uga tagay.
Dhiig meel walba.
Hooyadiis oohin.
Dhaqtarkii teetano dawo lagala-hortago buu ku
dhuftay, oo ilayn mindi mirartay baa lagu jeexay e, markaasuu dhaqtarkii
hooyadii ku yiri dhibkiisa
yaree haddaad rabtid kan in uu noolaado.
Boohin lee ahaa.
WQ: Afdhere Jama
Comments
Post a Comment